مراجعة فيلم باتمان وسوبرمان Batman v Superman

[KiLLeR SpIDeR]

السلام عليكم
ده ريفيو بسيط (ركز هنا بسيييط) يعبر عن رأيي في فيلم باتمان وسوبرمان الجديد: فجر العدالة Batman v Superman وممكن يكون في بعض الحرق عشان كده لو ماشفتش الفيلم ابعد من هنا أحسنلك grin emotico


هتكلم باللهجة بتاعتي المصرية لذا عذراً للإخوة العرب، عامة انا واحد من اللي بيحبوا الكوميكس بأنواعه ومش بانحاز بشكل كبير لمارفل أو دي سي ولكن بحب أتابع كله كمحب للشخصيات الخيالية، والفيلم كان معمول ليه ضجة كبيرة جداً وأكيد معظم الناس هتشوفوا سينما وانا منهم شفته والحمد لله، الفلوس اللي اندفعت فيه مش خسارة تستحق، وهنا هتكلم بشكل مختلف عن شخصيات الفيلم وأدائهم ورأيي اللي شايفه ويعجب أو ما يعجبش حد ولا أفرضه على أحد وعشان كده هتكلم باستفاضة كبيرة ....
بداية: هل ده أفضل فيلم كوميكس نزل؟ طبعاً لا وألف لا، هو ممتاز وكويس ولكن لا يقارن بثلاثية نولان اللي هي مختلفة من كل النواحي ومش بقارنها ولكن افتراضاً وهو أفضل من فلم الافنجرز الأخير بمراحل وأفلام تانية كتيرة لمارفل.
- سوبرمان: اه الفلم ده في بدايته قبل التصوير كان المفروض انه الجزء التاني لفلم مان اوف ستيل بس إتغير الموضوع وشنايدر زود كتير هنا، يعني المفروض فلم سوبرمان والبقيين ضيوف عليه، ولكن العكس حصل هنا نحترم فكرة المخرج، رغم ان أداء هنري كان بارد جداً في لقطات ولقطات لا، إلا إنه قدر ما يزهقش المشاهدين بسوبرمان لو كان ركز عليه، كان ده هيبقا أسوء فيلم ف حياتك مش كونه كوميكس بس، يبقى هنري مع سوبرمان عمل شو حلو وشغل كويس بس ....... في أفضل، تقيمي للشخصية والأداء 6/10، لأنه مكنش فعال رغم انه مهم وكمان كان فيه سذاجة وبرود.
- باتمان: هنا نأتي للقنبلة، أعتقد إن باتمان الموجود حاجة رررائعة ومميزة، بين أفليك وقع عرض الحائط خالص مش ضربه بس، أداء كان ممتاز رغم إنه مكنش كافي لعنيايا، خلاني متشوق جدا لكل لقطة يظهر فيها باتمان وشفنا أفليك أكتر بشخصية واين عن شخصية باتمان ومش عارف هل ده حلو ولا وحش، ما علينا، باتمان ده من أفضل أداءات باتمان مش هقول الأفضل لأن في ناس ممكن تتجن، بس هو وكريستيان بيل أقوى اتنين كباتمان حتى الآن، ضرب باتمان كان ممتاز جداً جداً مبتكر وسودويته وغضبه كان طاغي ولولاه الفلم كان ضاااع، اللبس مبتكر أوووي لكل الشخصيات مش هو بس والأدوات رغم إنها ما ظهرتتش كتير وشنايدر تعمد تقريباً إنه ما يظهرش الجانب التقني العبقري للخفاش ودي أحي المخرج عليها، لأننا مش جايين نعمل عرض عضلات هنا ( أيوة أٌقصد مارفل، هي متخصصة في عرض مواهبها في التقنيات والجرافيك)، نقطة إرتباط وانجذاب أفليك لوندوومن مقلقاني قدام ههههههههه، ألفريد هنا مظهرش كتير ولكنه وضح بإنه عصب باتمان، يعني لولاه تقريباً الخفاش هيبقا صرصار، تفكير بروس واين وقدرته في تركيز كل طاقته على تدمير سوبرمان كان عبقررررررررري، عيّشنا معاه الدور وف الأخر رجع حن تاني ههههه وابتعد عن الشر ودي حلاوة باتمان إنه يقدر يتحكم في مشاعره علطول، تقييمي للشخصية ولأفليك 9/10 ويستحق أكتر.
- ليكس لوثر: دي المفروض شخصية من أقوى شخصيات الشر في عالم الكوميكس وعدو سوبرمان اللدود، واللي شفناه هنا في الفلم ده عار بجد على الشخصية رغم إننا شفناه لأول مرة بشعر غير الكوميكس والأسوأ هنا هو اداء المبتذل "جيسي أيزنبيرغ" بصراحة أسوء كاست اتعمل للشخصية دي، والي عمالين يطبلوا في حتت كتيرة انه حلو والنبي بطلوا ألإورة ده العيل الصغير هيقلك إن دمه تقيللللل ومبتذل، الفيلم حول صراع لوثر وسوبرمان يبقا لوثر وباتمان وده "تاتش شنايدر"، نيجي نشوف محاولات جيسي في إنه يعمل لنفسه أي منظر فشل فشل ذرريع هو مفكر نفسه الجوكر ولا ايه!! لوثر مش مجنون بجسمه وتصرفاته مجنون في تفكيره فقط وذكائه بيساعده، مش هتكلم كتير عن الكائن ده كفاية، وتقيمي ليه مع التعاطف 4/10.
- لويس لين أو إيمي آدمز: دي كانت نقطة تحول كبيرة في الفيلم واتبنى عليها ف النص كل حاجة، لأنه كوابيس باتمان كلها كانت شِبه حلم يعني ممكن تكون مستقبل واقعي لو كانت لويس لين ماتت لما يقتلها باتمان زي ما اتضح في بعض الفلاش باك ف الفيلم، إفتتاحية الفيلم كانت بإيمي اللي شوية تمثل كويس وشوية تقلب لوح تلج!! مش عارف ليه رغم إني بحبها جداً كممثلة، وتعتبر هي العنصر الأنثوي الأكثر حظاً في الفيلم من بعدها وندر وومن وبعدين أم سوبرمان ومن ثم السيناتورة فينش و... وكان ممكن يستغنوا عن البعض من مشاهدها ولكن شنايدر لازم يعملها اهتمام دي "ممثلة تقيلة برده grin emoticon"، على كلٍ إيمي عملت شغل مش بطال وتبقى 6.5 /10.
- ووندرومن أو الجميلة غال غادوت: بصراحة دي اللي كانت مفاجئة نسائية جميلة اووي رغم ظهورها القليل وإنها اسرائيلة ولكنها كانت بتحبس الأنفاس بتواجدها، ظهرت كامرأة جميلة مثيرة مسرة للعين ف الفيلم وبعد كده شفناها الوحش الذي لا يقهر في أخر ساعة من الفيلم تقريباً، أداء غال كله لا غبار عليه، ممثلة كويسة وشبه أن الدور ليها مخصوص ومستني الفيلم بتاعها بفارغ الصبر السنة الجاية بعد ما شفت الأداء القوي في حربها مع باتمان وسوبرمان ضد دومسداي، كانت لقطاته وضربها وهمي فعلاً، تقييمي للشخصية 9/10 وتستحق بجدارة رغم قلة ظهورها.
- شخصيات فرقة العدالة: الشخصيات في نسخة السينما للفلم ظهورها كان قليل جداً وهما فلاش وأكوا مان وسايبورغ فقط مافيش جرين آرو ولانترن زي اللي كانوا مصميين على ظهورهم من بعض الفانز ويا عالم، وجودها كان لخدمة أخر لقطة ف الفلم وتوضح انهم هيتجمعوا بعد كده عشان أفلام الجاستس ليغ القادمة، في لقطات منهم وضحت شوية حاجات وشكلهم مكنش وحش كان مميز جداً عندك جايسون موموا وراي فيشر، بس كان في شخصية واحدة مهمة اتبنى عليها كل تصرفات باتمان لاحقاً وهي فلاش، اللي أنا كنت متأكد وواثق إنه هيكون عنصر مهم لأحداث الفيلم، فلاش ظهر لقطة 4 دقايق تقريباً لبروس واين يينبهه باللي هيحصل وإن لويس لين هي صلب الموضوع، ولكن إزاي؟؟ فلاش قدرته إنه بيسافر للزمن عشان سرعته الخارقة وهو الوحيد اللي ظهر لقطتين ف الفلم عكس باقي الشخصيات، المهم اللي قاله لبروس واين كان مهم جداً وخدم باتمان بعد كده، شكل فلاش اللي ظهر مكنش وحش بصراحة بس انا مش مرتاح للي بيقوم بالدور اللي هو إزرا ده حاسه واد كده مش واد ههههه، على أي حال، مستنين فلمه الخاص وكمان ظهوروه في الجاستس ليج بشكل أكبر، مفيش تقييم هنا.
_______________
منطقة الأشرار الفرعيين بعد لوثر:
- دومسداي: أو الجنرال زوود المشوه ده ف الكوميكس عدو من أعداء سوبرمان بشكل أكبر وف الفلم هتشوفوا ازاي ظهر دومسداي وكان شكله قبيح ولكن كان معقول ومميز كشرير، إزاي بقى شنايدر استخدمه ف الفلم وازاي اتخلص منه دي التاتش بتاعته وأكيد مش هنخوض فيها كلام، ظهور دومسداي كان كتير نسبياً عن بعض شخصيات الفلم رغم انه ظهر في اخر ساعة تقريباً، الجرافيك بتاعه كان ممتاز جداً ومش محتاج تقييم.
- أناتولي كنيازيف أو الممثل كالان مولفي: ده كان شرير اللي بيقوم بعمليات لوثر القذرة، دوره ظهر ف لقطات متفرقة شوية مع سوبرمان وشوية مع باتمان وشوية هنا وهنا، دوره كان ممكن التغاضي عنه ولكنه إضافة شنايدر وهو حر ف فيلمه grin emoticon ، المهم كان شرير وخلاص لا بأس به.
- ميرسي أو البنت الصينية: دي عنصر نسائي شرير وهي المساعدة الأيمن لليكس لوثر، ظهورها كان قليل برده ومكنتش مهمة أوي، بس عملت اللي عليها ولوثر فقعها بومبة ههههههههههههه، بلاش أقول حصل ايه، عامة عادي مش الشيء المهم اللي نتكلم عليه باستفاضة.
- بير وايت أو الاستاذ لورنس فيشبورن: الله ده إزاي شرير!؟ هقولك رأي هو من إمتى رئيس الديلي بلانت شرير؟ أنا حطيته شرير لأنه كان بارد ههههههههههه وكان فقيع فعلاً ومستفز في كل اللقطات اللي ظهر فيها كان بينقط غلاسة ورخامة وكان لا يطاق ويارتهم ما جبهوش مالوش لازمة بصراحة غير يضايق كلارك كينت ولويس لين وخلاص، بس ممكن لأنه غلس ف الكوميكس شوية، شنايدر حب يغلس علينا برده.
____________
- آل واين، "توماس ومارثا واين" اللي هما والدي بروس واين، ظهروا ف الأول وكانت لقطات بسيطة في باقي الفلم كانوا فلاش باك، لكن برده كل مخرج أو أي حد لازم يزهقنا لما يجي بروس واين لازم أبوه وأمه يجوا لما ماتوا، خلاص عرفنا إنهم ماتوا في ستين داهية، كل واحد لازم يتفنن ازاي ماتوا من وجه نظره وشنايدر وقع ف الفخ ده برده.
- مارثا كينت والدة سوبرمان، ديانا لين طلتها مميزة علطول وبصراحة هي كانت قليلة الظهور في الفلم ولكنها العضو الرئيسي المؤثر في سوبرمان وتقريباً شبه السبب للصراع بين باتمان وسوبرمان، كان لابد منها هنا وعملت دورها كما طُلب، وظهور كيفين كوستر والد سوبرمان لقطة بسيطة كان مهم لسوبرمان برده رغم إنه مات ف الفلم اللي فات.
- السيناتور فينش دي الممثلة هولي هانتر، عملت دور جميل اوووي وتحدت سوبرمان وكانت بشكل أو بأخر عاوزة تتخلص منه، دورها انتهى سريعاً ف الفلم وكان شرارة منها بدأت حدة تزايد الأحداث، يبقي دورها كان مهم أكيد.
- سكوت ماكنري: قبل الفلم مكنتش عارف هو لازمته ايه، ولكن عرفت إنه ضحية لسوبرمان وكان عاوز يقضي عليه، وقدر لوثر انه يستغله عشان يبدأ حرب فعلية بين سوبرمان وباتمان وفعلاً قدر ونجح وانتهى فيها سكوت، دوره بسيط ولكن حيوي.
________________________________
* حرب باتمان وسوبرمان
اشمعن انا كتبت باتمان الأول؟ لأن باتمان بصراحة كان رهيب وهو اللي عمل كل حاجة هنا صراعه مع سوبرمان كان مقنع جداً جدا وتقريبا مجمل اللقطات الصراع بينهم في حدود ساعة، باتمان تغلب فيها على سوبرمان علطول وكان هيموتوا بس ماموتوش، وده كان متوقع طبعاً وفي الأخر حبوا بعض وباسوا بعض grin emoticon ، الصراع كله والضجة بينهم كانت مجرد شرارة عشان بداية حاجة قوية في المستقبل، الحرب بينهم كانت مذهلة بمعنى الكلمة دي لوحدها أديها 10/10.
- ما بين الكوميكس وواقع الفيلم:
هنا ما يسمى مربط الفرس، شنايدر لعب على الطرفين لم يتطرق للكوميكس بشكل كامل ف الفيلم ولم يبالغ تماماً ويخرج عن سياق قصص الكوميكس مثلما فعل نولان في ثلاثيته، كان متوسطاً إعتمد على أساسيات كثيرة ف الكوميكس مثل بدلة باتمان المعدنية قوة الكريبتون وإزاي يسخره وأيضاً طريقة التخلص من سوبرمان وازاي ضعف من النووي وخلافه من أمور كثيرة وبدأ بناء نظرته ورأيه في كل شخصية ومنشأها وطريقة إكمالها للفيلم وممكن نلاقيه كون شخصية وأنهاها علطول في نفس الفلم عادي، وده مستحيل نلاقيه ف الكوميكس وخلافه، ولكنه شنايدر ولازم التاتش، هل النقطة دي في صالح الفيلم أم لا، ما أقدرش أحدد لأن عشاق الكوميكس ممكن يعتبروها مش كويسة والعكس واللي مش بيحبوا الكوميكس ممكن يلاقوها كويسة والعكس.
___________________________________
نقاط فنية:
- القصة: بعد ما قلت انه الكاتبين والمخرج حايدوا بين الكوميكس والسناريو الخاص بيهم، أقول القصة سقطت منهم شوية وعالجوها عشان تكون شبه عادية وليست خارقة أو ملتوية وقدروا يضيفوا عليها جانب سودواي كبير جداً جداً عكس ما بنشوفه ف أفلام الكوميكس ولكنها مش أول تجربة لشنايدر ف الكوميكس مع السوداوية بعد فيلم واتش مِن اللي يعتبر فعلاً فيلم عبقري رغم هضم حقه، القصة نقول 6/10.
- التصوير: شنايدر ملك التصوير والجرافيك وخلافه أعطى مشاهدة مبتكرة بلا مجاملة والماكياج اللي دور عليه رهيب، والفلم بكل تأكيد معتمد على الجرافيك والمؤثرات ودي أمر أساسي، تكلفت الفلم 250 مليون دولار ليست بالمبالغ فيها مقارنة بألام أخرى ويا عالم أكتر أو أقل، لأن شنايدر قدم باتموبيل وطيارة وبدلة باتمان مميزين وكمان كهف الخفاش كان جديد كليا وممتاز بصراحة، كان 8/10.
- الموسيقى: وهل يخفى القم!!ر هانز بصراحة أسطورة ولا أحد ينكر هذا، موسيقى الفلم كانت شيء مبهر ومميزة للفيلم رغم أنها ليست أقوى أعمال هانز ولكن لا نتغاضى عنها أبداً، أعطيه 8.5/10.
- الحبكة: أمممممم هنا شنايدر هو اللي عمل فيلم من مافيش تقريباً، جمع عناصر كاملة وقدر يخلط سيناريو مع تصوير كبير وأداء شخصيات جديدة عشان يطلع فلم ساعتين ونص.
- طول الفيلم: دي نقطة فضلتها لوحدها لانها بصراحة ضايقتني جداً يعني ساعتين ونص ف الفلم كان فيهم شبه تمطيط كبير أنا زهقت ف لقطات كتيرة ولو بايدي ف السينما كنت هقدم الفيديو هههههههه، لكن مافيش كان ممكن اختصار لقطات كتير والتغاضي عن أخرى عشان نحصل على ساعتين مثلاً بدل من ساعتين ونص ولكن مش دي المشكلة، المشكلة انه في نص ساعة كمان شنايدر مخفيها لنسخ البلوراي الممتدة للفيلم يعني كده 3 ساعاتgrin emoticon ، اللقطات يقال انها هتبقا ظهور بعض الشخصيات الجديد وتتطرق أكثر للجاستس ليغ ويا عالم، ومش عاوز اقول اني نمت شوي ف اول ساعة ونص من الفلم اللي كانوا مسلطين الضوء على أحداث بسيطة ولكني قلت أهو :d محدش يشتم هههه.
- فلاش باك: دي نقطة برده حبيت اتكلم فيها، تقريبا أول ساعة ونص من الفلم كلها فلاش باك لذكريات وأحلام لباتمان وسوبرمان، شنايدر بالغ فيها جداً، وخاصة لباتمان هي أي نعم بتوضح أمور تايهة وممكن معروفة لبتوع الكوميكس ولكن مش لدرجة كل ده فلاش بالك، وده سبب برده خلى الفيلم طويل.
_________________
احنا شبه كتبنا كتير ولكن الملخص ايه؟
- هل الفيلم عجبني؟ الفيلم عجبني أه كان كويس جداً ومش هظلمه ولكنه مش الشيء العظيم، ومش زعلان على الفلوس اللي دفعتها وممكن اروح اشوفه تاني ف السينما ولكن ببلاش grin emoticon مش قصة هي السنة طويلة وهنخسر فلوس كتير هههه.
- هل أحسن فيلم كوميكس؟ طبعاً لا وألف لا، في أفلام احسن منه في نظري زي ديدبول وفيلم الرجل النملة وفلم حراس المجرة وكمان ثلاثية نولان، يعني هو أحسن من أفلام الافنجرز كلها وافلام ثور وكابتن أمريكا وخلافه وحتى سبايدرمان الأخيرة.
- هل يستحق الضجة اللي عليه؟ الفيلم لا يستحق الضجة دي ولكنهم لازم يعملوا ضجة عشان يضربوا فيلم الحرب الأهلية بتاع مارفل، لو مافيش ضجة كده كل اللي بيعملوه هيضيع رغم اني واضق انه قصة الفلم ده رغم عدم كونها قوية هتبقى افضل بمراحل من قصة الحرب الأهلية اللي هينزل ف شهر مايو.
- في النهاية تجربة مميزة وجميلة ومش هقول لأحد لا تحضره، لا روح واستمتع بالفلم حاجة جديدة وأول مرة هتشوف باتمان وسوبرمان سوا في فلم سينمائي.
- الكلام كان كتير جدا وأسهبت ف الرأي قليلاً ومتأكد اني نسيت أمور كثيرة ولكن كنت أكتب حسب ذاكرتي للفلم، وكنت كتبت مراجعة لديدبول بس مكملتهاش واتمسح ملفها كمان، قلت خلاص خليها لأفلام تانية جاية.
- تقيم الفيلم كمجل 7.5/10، وده طبعاً رأي شخصي لا يزيد أهمية عن رأي أحد أو يضايق أحد، وممكن لا يهمه أحد الرأي، ولكن حبيت المشاركة مع الجميع.
أنتظر رأيكم جميعاً.
مشاهدة ممتعة لمن سيشاهده ودي نهاية الفيلم:

[BATMAN]

مجهود جبار بجد، تسلم ايدك يا بطل.

[KiLLeR SpIDeR]

تسلم يا بات بس انت خت علقة حلوة

[Dr.Death Tha'Don]

الله يعطيك العافية ... بخصوص الفيلم أنا أسمتعت كثير بمشاهدته وأنا كنت مركز كثير على شخصية باتمان وبصرااااحة بين أفليك أبدع بآداء الدور ... اللي كرهني في الفيلم حاجتين ... الأولى الدافع بين باتمان و سوبرمان كان ضعيف تمنيته يكون أقوى من كذا .... أما الثانية شخصية ليكس لوثر تمنيت أنها تكون أحسن من كذا وأرعب من كذا ... صحيح مر على الفيلم تقريبا سنة أو أكثر بس الى الآن أنا أتابع الفيلم ... وأحسن حاجة عجبتني أن تقريبا بعض الشغلات في الفيلم مأخوذة من الكوميكس ومن أفلام الأنيميشن وهذا اللي عجبني أكثر ... أتمنى فيلم JUSTICE LEAGUE يكون جد التوقعات ويكون أحلا من BvS