الجاستس لييج بين سنايدر و ويدُن!

بداية كدة ننسى أي حاجة عن الشئ العجيب الي اتقدم سنة ٢٠١٧ وبصراحة مستغرب جداً أزاي شركة كبيرة زي Warner Bros معندهاش حد يقيم الأعمال يعني أحنا ككتاب بنكون لجنة لقراءة أي عمل لينا علشان يطلع بجودة قيمة تستحق ونفس الأمر لأي دار نشر بيكون عندها لجنة لتقييم الأعمال فإزاي شركة عالمية بحجم Warner Bros معندهاش لجنة لتقييم العمل إزاي شركة قيمتها مليارات بجانب أنها -وللأسف- بتتحكم في أعمال شركة أخرى هي أساس الكوميكس في العالم زي DC تبقى بالضعف الفني ده؟!

دي حاجة، الحاجة التانية أتمنى وحاجة لله كدة ان شركة Warner Bros تعرف قيمة اللي بتقدمه و اللي في إيدها، الكوميكس الخاص بـ DC ظلامي جداً تقريباً و مفيش شخصية من عالم DC ممرتش بمأساة، فحتة اللايت كوميدي دي عمرها ما هتمشي معاها، DC ظلامية وهتفضل ظلامية فبلاش نبص لخارج دي سي ونحاول نقلد واحنا في ايدنا نعمل عالم مميز و مختلف الكل يقتدي بيه.
دي مقدمة كان لابد منها، عارف اني اتكلمت عليها بس حابب أاكد عليها تاني وتالت ورابع…!

أما عن الفيلم…

-بداية عارف لما تلاقي حاجة شبهك، عارف لما تقرا عمل وأنت صغير وتلاقي العمل ده بنفس ابعاده بيتجسد قدامك بشكل عظيم على الشاشة ده الي حصل في الفيلم ده الحقيقة. الفيلم تجسيد حرفي للكوميكس وشخصياته بنفس أبعادها وأفكارها كأني بشوف العمل ورقي بالضبط!

-نيجي على الجو العام والصورة والالوان مقدرش اقول غير انها فخمة عظيمة روعة يكفي أني اقول اخويا مارفل فان ومتعصب جداً اتفرج على الفيلم امبارح كان منبهر بالصورة بيقولي الألوان في بعض المشاهد كأنها ابيض واسود لولا اني شايف وشوش الناس متلونة كنت افتكرت ان الفيلم ابيض واسود…!

-القصة والحبكة واضحة من غير لف ولا دوران ولا عمق اوفر – وده كان يمكن عيب في فيلم BVS ألا وهو العمق المبالغ فيه لكن هنا فكرة الفيلم واضحة صريحة مباشرة وسلسة ببداية ووسط ونهاية واضحين فيهم احداث تقيلة ومشاهد ملحمية.

-الشخصيات وما ادراك ما الشخصيات، كل شخصية واخدة حقها تالت ومتلت اللهم إلا -أكوامان- اللي شخصيته قل دورها شوية في الفيلم ده في المقابل باتمان عظيم جداً جداً، شوفت باتمان اللي بحبه القائد اللي مش بيضحك اللي بيعمل حساب اللي بيواجهه بدون خوف، يا راجل ده باتمان لما واجه سوبرمان وصد آشعته بإيده انا سقفت وافتكرت الهرتلة اللي عملها جوس ويدن في باتمان في نفس المشهد ده و لعنته! تعالى بقى لسايبورج اللي قريت أنه هيكون قلب الفيلم وفعلاً سايبورج تقريباً مفاتيح الفيلم في ايديه، تقديمة عظيمة جداً جداً لشخصية عظيمة عانت قبل ما تكتشف ذاتها، فلاش حدث ولا حرج ومشهد السبيد فورس العظيم اللي خلاني أمسك نفسي لفترة مش مصدق نقله على الشاشة! بجانب وندروومان و سوبرمان اللي شوفت مشاهد أكتر ليه حتى جوردون واخد حقه في الفيلم!

-نيجي للفيلن في ٢٠١٧، كان في حج كدة اسمه ستيبن وولف Steppenwolf كان ماشي بيتجول في الفضاء فجأة افتكر انه نسي حاجة اسمها ماذر بوكس ونزل ياخدها من الارض -حاجة كدة زي اللي نسي شاحن الموبيل وجه ياخده- طب الماذر بوكس دي بتعمل ايه؟! لازمتها ايه؟! ولا الهوا!! طب الحج ستيبن وولف ده مين؟! لا مفيش ده راجل جاي يتهزق ويمشي، لكن في نسخة المبدع زاك سنايدر أخيراً عرفت الدافع وراء قدومه الارض و مين هو، علاقته ايه بدارك سايد، و أهم حاجة اشمعنى جه في الوقت ده بالذات؟ في نسخة ويدن هو جه عشان كيفه يجيي دلوقتي -كيفه كدة- وعشان ياخد الماذر بوكس اللي أخيراً عرفنا ايه هي أصلاً و أهميتها ويعني ايه معادلة مضاد الحياة؟ وحط تحتيها ١٠٠ خط، يا راجل من الاخر بقى فيه فيلم بجد يعني!

-دارك سايد Darkseid، ظهوره عظيييم في الفيلم و مشهده مهيب جداً جداً خلاني عاوز اشوف في ايه؟! ايه اللي جاي منه و من ورائه؟! يكفي اني اشوف شخصية زي دارك سايد بتتجسد قدامي بعظمتها على الشاشة ده كفاية علية فعلاً!

-الافتتاحية عظييييمة جداً، النهاية خرافية و السبيد فورس…نصيحتي ومش هحرقها شوفوا المشهد ده أكتر من مرة وتخيلوا كده فلاش ممكن يعمل ايه في فلاش بوينت بعد المشهد ده وشوفوا النايت مير و شوفوا عظمة اتحاد باتمان مع الجوكر و شوفوا شكل فلاش اللي كان في حلم بروس وين بالضبط، شوفوا مشهد سوبرمان وهو…لا مش هحرق شوفوا المشهد بس واستمتعوا!

– على الرغم من ظلامية الفيلم بس كان في كام مشهد حواري كوميدي جداً، يعني مشهد وندروومان وهي بتعلق على اختراع آلفريد و قفازات باتمان وبتقوله خليه يخترع سوط بس اسود، بجانب مرح فلاش في الفيلم، ده حتى سايبورج اللي جد طول الفيلم رمى افيه على عمر وندر وومان فالفيلم، فيه كام مشهد مرح فعلاً بس بعقل و بحساب و رزانة تحافظ على توزان الفيلم.

في النهاية الفيلم عظيم عظيم عظيم، زاك سنايدر عمل المستحيل تقريباً علشان المجهود العظيم ده يشوف النور و انه يختصر هرتلة ١٠ سنين من DC في فيلم واحد يبين ملامح عالم DC بالكامل ويخلينا أخيراً نشوف عالم كامل مترابط، فمعلش ولو فيها رزالة يا Warner Bros وبعيداً عن الحنكة بتاعتكم ياريت بس تخلوا زاك يكمل العالم بتاعه، معلش لو ده هيضايق روح الفكاهة الي جواكم يعني!

من الآخر الفيلم عظيم جداً و ملحمي، اتفرجوا على كل مشهد فيه واستمتعوا بعمل تاريخي ونصيحتي عيدوا ٣ مشاهد في الفيلم كتير…مشهد حرب الارض ما قبل التاريخ مع دارك سايد والسبيد فورس والنايت مير…دول افلام لوحدهم حرفياً!